الإثنين , 25 يونيو 2018
أخبار عاجلة

كشف تسربات المياه بالرياض

الرئيسية / فنون / بالفيديو ..قصيدة ( مالم أسطع عليه صبرا ) لشاعر الجوايده .. محمد الجوايدي
الشاعر محمد الجوايدي
الشاعر محمد الجوايدي

بالفيديو ..قصيدة ( مالم أسطع عليه صبرا ) لشاعر الجوايده .. محمد الجوايدي

( مالم أسطع عليه صبرا )

لشاعر الجوايده .. محمد الجوايدي

الزفه طالعه من مكان ماغزيت

نصبوا الصوان علي روحي فاتأذيت

هدوا الحيطان والسقف سانده عمود

روحي اشتكت مالقتش غير نمرود

قام رد قالي ازاي سابوك لـ تفوت

وانا كات اوامري ينسفوك بالبيت 

زاد الصويت علي عُقدي زادها بربط

النص دا مرتجل زي الحياة بالظبط

من غير ضوابط وزن..والكفه مايله لفوق

بغرق في بحر فراق أمواجه شبعت خبط

والقصد كان تفويق

وبرغم كل الدقدقه علي راسي مالحجاج

ميت بفعل المنكرات

لا أي أعراض لارتجاج

رصيت لراسي صفين كراسي

علي قهوة بلدي

خدت العزا

كان اعوجاج الحزن خيم عالحضور

وانا وحدي من صابه الاذي

معذور جميع من شاف ملامح ضحكتي

فاتبسموا

لم يعلموا

إن اللي جاي تأبين لروح عاشت تبوح من فعلهم

تشكي مرورهم جوا منها كداء

ماتت ولسه إسمها مكتوب من البؤساء

 

مالم أسطع عليه صبراً

إني أعيش مشتاق لطفولة مااتوجدتش

أو سطر كنت أتمني يكتبني في قصيده

يعزفني لحن لغنوه ماتسمعتش

تبكي السما علشاني وانا واقف

وبحور لدمعي في مكه تفيض علي الطائف

فـ يشوفوا عيني آبار يلقوها مااتبلتش

أو إني أهرب من بلاد القرش لبلاد

مااحسش وسطها بغربه

أو حتى حضن يكونلي فوق الارض

مش كل مااجي اتحضن انزلها التربه

 

مالم أسطع عليه صبراً

كتر الوعود في الليل لسرير مُتع أحلام

تنزل لها عالأرض

يقلب نهارها كلام

ونعيده مالمغرب

ماتصُبليش الميه في الغربال

وتقولّي قوم اشرب

وتسيبلي حبة أمل بيفروا آخر الحلم

وإيديا متكتفه

ماتوصنيش بالدفا

وأنا كوم عيال بيمددوا فوق الرصيف

طوبه بيخشي ذنبهم سحب الربيع طول السنه

لاتمسهم نفس الخطايا في ركب وهج الصيف

اديني بس خيوط لحاف أغزل حدود للوطن

واديها لابني بطول عباية تستره وسط البلاد

ماتعري هامته زي أبوه

ويلاقي نفسه وسطهم تابلوه ضعيف راح يتكسر

أول رياح هتهب فيه

ترميه ذليل تحت الجليد

قبل ماتحل الصيام

إضمن لي إن هييجي عيد

 

مالم أسطع عليه صبراً

إني أشوف دخاني خارج منهم

ومحرمنِّي اشرب سيجار

أفيد علاج للقلب

رجمه بالحشيش

علشان يعيش وسط المهالك ضيف خفيف

وإن صابه سهم في معركة يهلك عدوه

مايطغيهوش وهواه نحيف

مكتوب علي باب السما مفتوح لمن أكرم لضيف

فـ ماتتكئش علي عصايا

وتيجي تعايرني عشان كفيف

 

مالم أسطع عليه صبراً

إن الخريف مبقاش يفوت من غير شروط للذل

وانك تمل من الشتا هيمل فيك

فارض عليك حق الخضوع لمسكنات الليل

هاتعيش تموت وسط الكلام كله بسكوت إنك ذليل

بتدور سواقي العمر فيك ترويك

فتفيض عليك حتي تموت غرقان

مين اللي قالك بس قول عطشان 

والشمس متكتفه وسط القرون العجاف

استني ييجي الليل واشكي لسبع أطواف

ملقتش فيهم طرف مالسبع السمان

كان أولي بيك ياحزين

انك تعيش كغريب

أو تمشي جوا الحيط

علشان تموت في أمان

 

مالم أسطع عليه صبراً

إن النصيب تغريب وإني يدوب إنسان

عن admin

اترك تعليقاً

لن يتم نشر عنوان بريدك الإلكتروني.